U CAMPU D'ERBAGHJU

Trà finzione è puesia, un ghjornu ci truvaremu in a culletta d' Erbaghju…

Albore

Classé dans : Puesia corsa — 9 octobre, 2017 @ 2:36

bourreau

A so maistria avia francu e cunfine di Marintarra è a ghjente viaghjava assai par vedelu à u cumandu. I prima tempi, i paisani, sempre curiosi, vinianu à vede qual’ellu era stu parsunaghju ricrutatu di pocu à quellu postu.  In pocu tempu, a messa in scena di a so opara è a minuzia ch’ellu mettia in u so travagliu avianu fattu di a piazza à a forca u locu di divartimentu u più corsu di tutta a cuntrata.

U missiavu, u babbu, un ziu, ellu… in a famiglia, eranu tutti di mistieru è Arcione ùn avia micca ricusatu sta pruposta fatta di parte luntanu par stantà a so vita anch’ellu.  L’umatone di 2 metri raprisintava à ellu solu tutta a furzaccia chì si pudia truvà inde a natura animale. S’induvinava un capu tamantu à quellu d’un vitellu postu annant’à una spalla di cavallu. Da a vita à i pedi, tutti i musculi di l’anche s’assumigliavanu à quelli d’un cavallu infuriatu prontu à u galoppu. U so scurzale li paria d’esse troppu strettu è ùn n’andava cusì bè à a so pitturiccia larga è piluta abbastanza da fà rinculà un ghjuvencu o ancu un toru. Dopu hè vera chì…Ùn hè cà a so manu dritta…Hè sicura chì senza quella infirmità, i più grandi artisti di a Grecia antica avarianu lasciatu corre à Ercule è sceltu i marmari i più immaculati par fà d’Arcione una scultura sempiterna.

U so bracciu tesu sopr’à u capu, s’appruntava à minà fermu ! Tutti i musculi di l’arcifalu s’imbuffavanu di u listessu sangue ch’ellu avia da fà corre avà. Era cum’è una ultima cumunione trà u more è u campà, Arcione è l’assassinu, a Vita è Falcinella chì vulia u soiu anch’ella…

Schlinggg !!!

U tagliu largu è luccichente di a piulona arrutata cum’è un rasoghju avia scapatu u ghjuvanone senza ch’ellu ùn si senti  mancu u taglià di l’osse di u so collu. Senza circà di sapè u nome di u zitillone o i fatti chì l’eranu rimpruvarati, l’evvive paisane rimpiazzonu subbite u silenziu di a piazza è si rinfurzonu quandu chì u troppu,  intintu d’un culore rossu è tepidu, purtava drittu drittu u capu chì vultulava,  à vuchera di sangue, sin’à indrentu a sporta quant’è ch’ellu fù una cubì tirata da un zitellu ind’un tafone.

Avà, a manu manca appughjata annant’à u manicu, cum’è stantaratu, Arcione stava fronti altu è corpisticchitu davanti à a ghjente chì, discurendusila, cuminciava pianu pianu à parte da a piazza. Ognunu parlava di a prova di u bioa è di a manera ch’ellu avia di manighjà sta piulona. I più in ammiru stimavanu ch’ella pisava 30 chilò è forse ancu di più !

- Casa… ùn ne avaranu micca ? pinsava Arcione chì bullia di stà cusì fermu dipoi un quartu d’ora.

U spittaculu era finitu è, à tutti, a vita, chì paria d’esse più alegra, ripigliava u so versu ma, à Arcione, li tuccava sempre à fà ciò chì solu un boia avia u drittu di vede, di cunnosce è di fà.

Ùn si sintia più un ansciu annant’à a piazza è a dulcezza sittimbrina vinia à more anch’ella à st’ora tardiva di u dopu meziornu. Arcione decise infine d’abbandunà a so pusizione impalata. Si cacciò u so coprifaccia è purtò, à a vasca di a funtana chì si truvava in u fondu di a piazza, u troppu castagninu è a piola ch’ellu  vulia lavà prestu di tutte e ghjeppe ch’elli avianu addossu.

- Minà ! Stu sangue hè tuttu una merda à richjarà una volta ch’ellu hè inchjappitu…Eppo e mosche… ahuuu !!

Fatta a pulita, ci vulia à siccà tuttu è unghje bè a piola da ch’ella ùn s’arrughjinisca micca. Annuttava dighjà quandu Arcione finì tutte ste faccende.  Quant’è ch’ella fussi un eghju, u boia spugliò a salma, a pigliò pà u fil di u spinu è a si messe annant’à  a  spalla manca. Dopu ripigliò a piulona in manu è si n’andò. Incù tuttu stu pesu ch’ellu strascinava, a so andatura paria strana ancu di più è à ogni mumentu, si saria dettu chì a so parsona squilibrata avia da intrappulà è abbattesi cum’è una leccia sigata…

À st’ora tardiva, era una bona par ellu d’ùn iscuntrà più à nimu in carrughju. A paura di i mazzeri, di e streghe è altri moghi era d’ogni mumentu par tutti sti paisani chì stavanu inchjustrati in e casaccie soie è chì mancu una saccata d’oru ghjunghjaria à falli sorte fora.

Arcione ghjunse vicinu à ind’è ellu, senza esse ricca ricca, i dui piani di a so casa a facianu passà par esse una di e più belle casa di u cantone. Tutte e spese eranu pigliate in contu da u signore è, in fatti di pighjò, Arcione ùn pagava nulla.

I dui mannarini ammandriati accant’ à a casa, fecenu prestu à sente a fumata di u sangue chì schizzittava sempre un pocu à ogni passu ch’ellu facia Arcione. Tandu si fece sente un chjam’è risponde di  grugnichime, di mughji  è di brioni da accioncà un cristianu tantu a fame è a brama di carne fresca li era insuppurtevule. St’adore di u sangue li scimia e ciarbelle è accicava i so sensi animali : cù a sciuma in bocca, i dui maghjali sciaccavanu i morsi à l’aria, bavacciulavanu è si civravanu u palancatu indibbulitu da a putenza di dui porchi arrimbati.

Aricone l’allittò pà calmalli…

- Tiò tiò tiò… Titiii titiiii !

…è senza fassi entre, lasciò cascà a salma spugliata annant’à  i dui carnaghji chì, arritti annant’à i pedi di daretu è appughjati contr’à u palancatu, minacciavanu d’abbatte tutta a sarrenda in tarra da ciò ch’elli puntavanu forte.

Avà, a civa pudia cumincià ! A salma paria d’esse una mariunetta tirata à l’aria da calchì filu invisibile tantu ch’ella vulava à l’aria da e fracate purcine. Prestu u ricordu dighjà sparitu di u cundannatu s’avia da ritruvà in e trippe piene di l’animali. ‘Ci chì u mortu allarga u vivu…

Pà a finestra, si vidia una lumera chì alluminava a cucina induva una donna priparava a cena. Tuttu passendu, Arcione si cacciò u so scurzale di coghju è l’appiccò à u chjodu di u carciarellu induv’ellu l’aspittava un ghjileccu pulitu ch’ellu si messe. Sarrò i purtelli, dede un’uchjata à i purcelli chì si mastacciavanu à chì un pede à chì i minuci, è intrì in casa fendu un bellu surrisu à quelle di a so famigliola.

- O bàà ! O bàà ! s’esclamò Albore, a so fighjola di 7 anni chì curria pà saltalli in collu.

- Aspetta o fighjulè – rispose u gigante -  Aspetta una siconda ch’e’ basgi à mammata quantunque…

Senza mancu sente ciò ch’ellu dicia u so babbu, a zitella u puntò ver di una carrega da furzallu à pusà è si fece piglià in ghjinochju da l’umatale chì ridia di core.

A zitella pigliò a manu dritta d’Arcione inde a soia è partendu da a spalla, li carizzava ogni locu u bracciu falendu sin’à a manu. Ahhh stta manu intrammanata, tamanta à quella di a so figliola, chì vinia in punta di u ghjovitu cù e so cinque ditarelle à rampinu chì altru nimu cà Albore ùn avia u drittu di tuccà senza risicà di fiscà a morte. Una manu mandata da u distinu cum’è una sfida à Arcione par impidiscelu di fà un antru mistieru cà quellu di a so sterpa ghjastimata da leva in pulleva.

Stava mutu, fidighjava a zitella chì, tuttu ghjuchendu è cuntendu una storia, li facia un cappucciu di lana in punta ad ogni ditu cum’è par prutege u babbu è a so infirmità da e rise paisane.

A benistà d’Arcione era d’ùn avè micca avutu un masciu…

È fidighjendu una cruciarella in legnu appiccata à u muru, Arcione pinsava :

« O mini-Cristu chì tù sè,  tenila puru sta manu chì tù m’ai ricusatu. M’ai avutu à mè cum’è l’altri masci di a famiglia ? Ma à ella… ella ùn l’avarè micca !! »

- O bà, ch’ai fattu oghje ? T’aspittavamu incù mamma ! Ripigliò a zitella ch’ùn piantava d’inghjumellà e dite è d’invintà fole.

- Ch’aghju fattu… ch’aghju fattu ? Chì voli ch’e’ fia ? Ci vole à travaglià…nò ?

- Iè hè sicura…ma dumane… possu vene incù tè ?

Fior d’acciaghju

Classé dans : Puesia corsa — 12 septembre, 2017 @ 10:17

20953155_111189119611281_5136499659704112031_n

À u tempu chì corre cù l’acque sittembrine
Capisce u rusignolu ch’ella hè compia a stagione
Quandu chì a natura à l’entre di u vaghjime
A rughjine sumena par tuttu lu rughjone

Hè tandu chì l’anfarte u core à u fucone
Si mette à sunnià trà monti è marine
À a scrittura di e prossime canzone
Quandu u sale è a neve l’infioccanu e rime

U fiume chì si piglia incun ellu a fronda
À scopre d’altri mondi a si porta in viaghju
È tuttu un universu si stende sponda sponda

U pueta hè listessu è sempre à penne aparte
Invita ogni musa à sparte a so arte
È di carta è d’inchjostru ci nasce un fior d’acciaghju

Currispundanza

Classé dans : Puesia corsa — 22 août, 2017 @ 3:26

Les-Cochons-Sauvages---Sangliers-au-telephone--jpg

Ùn sò micca un induvinu
L’affare ùn era privistu
À un cignale mastinu
Arruvillatu da Pristu (<= nome di u me ghjacaru  risa  )
Ci aghju persu u me funinu
Nimu di voi ùn l’hà vistu ?

Ci sò turnatu à andà
Una volta, duie è trè
Cù primura di truvà
Quellu chì cù gran piacè
Parmittia di chjamà
È dumandà “ vai bè ?”

Incù arte è virtù
Mi sò messu à ruspà
Aghju cercu tantu è più
Duva ellu pudia stà
Ma cerca inghjò è insù
Si n’hè firmatu quallà

S’hè strappatu u me core
Aghju pientu è stridatu
Eru prontu ancu à more
D’avellu abbandunatu
Ma ghjuntu in l’uparatore
L’aghju prestu rimpiazzatu

Stu matiriale cambiatu
Sempre a voce si tace
Chì u numaru sguassatu
Di truvallu ùn sò capace
Hè cusì ch’aghju impinnatu
Par divvi “salute è pace”

A più bella a vi contu
Ch’era à u mese di sittembre
In a machja cum’è un tontu
À flagillammi e membre
Branculai lestru è prontu
Ma u cignale….. corre sempre !!!!

Pace è salute !!!

Erbaghju (04/01/2017)

CACCIA D’ORU

Mi prisentu da cinghjale :
Sò cruciatu ma mastinu,
Pè mezu porcu nustrale
Pè mezu salvaticinu
Ma l’unicu animale
Chì hà un telefuninu.

L’aghju trovu di ribattu,
In fondu di a spilonca,
È, ben’ chellu fussi piattu
Sott’ à una ghjemba tronca
Ci scuprii u ritrattu,
D’un certu Stefanu Conca.

Cunnoscu d’ùn bellu pezzu
U furdanu ritrattatu
In stu picculu attrezzu
Cù u quale m’hà ghjustratu.
Da trè anni s’hè avvezzu,
Furtuna ! Hè sgalabatu.

Ormai, grazia à Dìu,
Li facciu perde la faccia,
Da ch’ellu piglia l’abbrìu
Pè a so’ solita caccia
Cù tuttu u so’ cunvìu
U seguitu à la traccia.

Ùn pò più fà cum’è prima,
Quandu cù a so’ antenna,
Pigliava posta, in cima
D’una culminante zenna.
Pensu ancu chì a rima
Ammutulita, chinchenna.

Pè diventà muntagnolu
Ùn basta mutà di pannu.
Perch’un telefunu solu
Possi fà tamantu dannu,
Vogliu porghjeli cunsolu
È dilli bon Capudannu.

Ancu si moltu mi costa
Di fà simili richjeste,
Una tregua l’hè pruposta,
S’ell’ ùn ci mette prudeste,
Ch’ellu spachji ogni posta
Pè u tempu di e feste.

E tregue sò benvinute
Ancu si l’odiu tenace
E ci rende mal vivute.
Ma si questa li cunface
Li auguru Salute
S’ellu mi lascia a Pace.

È pè esce di st’ intrescu
Secondu i voti mei,
Vogliu dì à ‘ssu burlescu,
Cùn ottimi caladei :
U numeru cinghjalescu
Cumencia sempre per sei !!!

Ghjuvan Petru Ristori (05/01/2017)

 

Risposta à Stefanu Conca

Chì piacè quessa matina
Di riceve i t’auguri
Scritti cun rima calina
Per gradisce i futturi
Chè t’appii in sta lettarina
I mo voti i più sicuri.

Pregu à tè è à i toi
Un’annata senza uguale
Tanta saluta eppoi
Dui soldi, ch’ùn hè male
Eppo pregu centu annoi
A u pessimu cignale.

Stu cignale sempre corre
Mez’à quella Marignana
Manderaghju un cacciatore
À disturbe a so cuccagna
Per salvà u to onore
Di pettu à quessa macagna.

S’ellu ci vole a ti dicu
Viotu tuttu u canile
Eppo partu o car’ amicu
Appress’u cignale vile.
Li prumetu gran’castigu
Chì ghjè bonu u mo fucile.

In quantu à u teleffonu
A so perdita hè trista
Hè smaritu u so sonu
Attemp’a famosa lista* *(a lista di i numeri)
Quandu u capu* ùn hè bonu *(à ch’ùn hà capu…)
Ci vole l’anche è a vista.

Quandu a sorte si rivolta
Ùn ci vale a furtuna
Sè a to ragione ascolta
Per chì frachja stessi una
Per a to prussima volta
Pensa à metteci una funa.

Torna un pezzu u ti facciu
Dopu ti lagu riflette
Per tè u mio amicacciu
E mo speme ne sò scelte :
Ch’ùn t’accadi st’affaracciu
Per dui’ mille dicessette.

Tittò Limongi (05/01/2017)

À l’amicu di Tavagna
Di mistieru prufissore
Cunfermu chì sta macagna
Fatta à u cacciadore
Di sittembre in Marignana
L’aghju campa cù orrore

Ma tù mi dai u curagiu
È mi sentu andà megliu
D’amparà chì u viaghju
Sin’à lu paese meiu
Sè prontu à fà di ghjinnaghju
Dunque ti rispongu anch’eiu

U cignale l’ai detta
Incù l’aiutu di Diana
Dorme sempre in a filetta
S’ellu ùn hà leccu a tartana
Inde calchì posta stretta
Di Balogna, Ota o Piana

À quellu cignale corsu
Li prumettu tanti affanni
Chì prestu à u rinforzu
Pristu avarà i to cani
È cù tè à u succorsu
Ghjà sò pronti i paisani

Passendu piglià à Francè*
Chì ellu sà caccighjà
È ùn ti scurdà d’Ancey**
Hè forte par scucinà
Ristori*** à u me parè
S’ellu vene hè par manghjà

Pocu cunfidenza aghju
In quellu chì conta male****
Piglialu sempre un viaghju
Fendu u to giru stradale
Cunfonde trè è un paghju
Ellu ùn pò tumbà cignale

Sì luntanu hè Bunifaziu*****
Lascia corre eiu mi cansu
A possu fà senza straziu
Par amparallu innanzu
Ch’ellu ùn mi tirga di laziu
Annant’à un porcu mansu

Tù chì ai par distinu
Cum’è casa a machja corsa
Avà mi rendi u funinu
O ti femu quella mossa
È cum’è un assassinu
Ti lamparemu in a fossa

Erbaghju (06/01/2017)

* Francescu Simeoni

** Olivier Ancey

*** Ghjuvan Petru Ristori

**** Brandon Andreani

***** Jean fred Terrazzoni

Par a to festa

Classé dans : Puesia corsa — 13 juin, 2017 @ 9:59

1-OaBAvnt-4e9c89g0Hcc27g

Cù u surrisu
Sempre sinceru
Vecu u to visu
Sò cusì fieru

In e to bracce
U mondu hè altu
Mi sentu in pace
Sò di più sgualtru

Pigliu u passu
Di u to stradò
Nant’à stu chjassu
Sò più maiò

Cù a maestra
Aghju appruntatu
Par quella festa
Di u me babbu

A puisia detta avà
Bona festa
Bona festa o bà

Bona festa o bà

Classé dans : Puesia corsa — 13 juin, 2017 @ 9:52

51JR3XGD0HL

 

Un surrisu di tè
Mi face apre a bocca
È sprimu lu vulè
D’amparà à parlà
O bà !

Una manu di tè
Chì m’insegna a strada
È ti dicu u piacè
Cù tè di spassighjà
O bà !

Un’uchjata di tè
U ghjornu di u parte
È sente : “O figliulè
Sè un omu avà”
O bà !

Un basgione par tè
In segnu di ringraziu
Par a to festa hè
Ciò ch’e ti vogliu dà
O bà !

A tregua

Classé dans : Puesia corsa — 16 décembre, 2016 @ 3:06

senegalese 2

 

- Chjamate u culinellu !
– U me culinellu… Tinente Provence à u raportu. Vi chjamu par annunciavvi chì stu dopu meziornu, l’emu fatta à piglià a suprana annant’à e pusizione nimiche di a tomba rossa !
– Vi filiciteghju tinente, vi filiciteghju….. è ùn mi scurdaraghju micca di quandu m’aviate prumessu di piglià a tomba rossa innanzu à a fine di l’annu…È.. i suldati… n’emu persu assai ?
– A midità di u battaglione, ma… a sapete…
– …hum… Bon natale tinente è ùn aghjate paura… !
– Bon natale u me culinellu !

L’invernu anch’ellu era di parolla è à a prumessa fatta, a prumessa fù. Ancu u pisciu di i suldati paria d’esse una surgente cutrata quandu omu si facia addossu à e mani, pruvendu à riscaldà a so parsona. Maladetta guerra, a stridura siccava carne è sensi ! È quellu ch’ùn si pigliava micca una palla in corpu; patia tandu a disgrazia, forse ancu più crudele, d’ùn avè micca a furtuna di more abbastanza prestu par ùn campà più st’infernu tarraniu.
“È civa s’ella si more, fatta fatta ! D’ogni marena, mi ! ch’emu più da campà chivi ?” dicia spessu u sargente Planchon, davanti à l’altri suldati impustati incun ellu in e trincere. Par fà u fieru, si mittia a pistola in bocca fendu cum’è s’ellu avia da apresi e ciarbelle ma, fatta fine, l’altri sapianu bè chì a so vulintà di campà, è a brama forte, ch’elli avianu tutti, di sente sunà u ghjornu di l’armistiziu era troppu forte par appughjà annant’à u chjodu.

- Diavule di a tomba rossa è quelli chì a si volenu piglià ! 3 mesi à stà chivi à cuntà è cuntà torna i 459 chì sò dighjà partuti… rughjava u sargente i pulmoni mezu cà brusgiati da i gasi.
Eramu u 24 di dicembre è dopu à 3 mesi senza ùn avè mancu avanzatu d’un metru, tutti quelli ch’avianu chisiati a morte eranu stanchi di liccà l’attacchi nimichi. U ghjornu e palle è a notte i gasi, senza riposu, senza pace è cù poca spiranza di rientre un ghjornu in casa soia. È chì sarà sta sera ?

Dopu à parechje dumande di u tinente, u statu magiore avia accitatu di mandalli in sustegnu un battaglione di centu tiragliori africani. Ghjunsenu a mane di u 24.
– Bellu rigalu ch’ellu mi face st’inculatacciu di ginerale Godot. Ch’aghju da pudè fà cù scimii cum’è questi !!! briunava Provence sottu à u tindone di u telegraffistu chì pigliava i missaghji di a ierarchia.
– Avà ùn mi manca più nulla ! Cusì sì ch’aghju da piglià a tomba rossa, in culu sì, chì a m’aghju da piglià !!! Ma ch’elli mi mandinu puru i talianacci di u 173 è cusì, in fatti di barbari, saremu à u cumplettu ! Provence scimia…
Ma l’affare hè chì, di pettu à e prove di quelli di u 173e chì si battianu cum’è lioni, i tinti africani, parianu più incustumati pà u carnavale cà suldati di u fronte. Scalati di pocu annant’à e coste francese, eranu di pocu rinforzu cù stu fretu chì li mursicava a pelle è l’attrappava i musculi. Sbisciaratu, Provence facia u pass’è vene in ogni trincera è pà sfucassi, u tinente minava cazzotti à sciappassi e nodule in capu ad ogni neru ch’ellu truvava agrunchjatu da u tardavellu.

À u più luntanu chì l’arechja pudia sente, un silenziu pocu abituale spavintava certi suldati più cà u fracassu è e cannunate d’ogni ghjornu. Ùn si sintia un verbu in locu è i più anziani, scarsi è furtunati d’avè campatu un annu di più, s’arricurdavanu di a tregua di Natale. U no man’s land era un pattu uffiziozu, un’uretta di pace è guasi di fratillanza da pudè sparte cù i bosci i soli affari chì omu avia : sigarette è pinard chì paria più flemma cà vinu. È dumane, senza pudella parà, si sapia chì i Lebel turnarianu à risponde à i Mauser…

Provence fece chjamà u sargente Planchon.
– Sargente, pigliate duie botte di pinard è fatele purtà da 50 neri quallà à mezu à u no man’s land. Ch’elli si riscaldinu un pocu cù…Chì dumane a festa ricumencia…è n’avaranu bisognu !
– Iè ma è l’altri u me tinente ? dumandò u sargente.
– L’altri staranu chivi è i vostri suldati dinò, ùn sbriacanu mai quessi ! Ci vole à tene a pusizione è u matiriale… ùn si sà mai !
– Ma…
– Ùn ci hè nè ma nè è, andate !

Cù un stracciu bruttu liatu à u manicu troncu di una pala, si visse tandu una cinquantina d’africani chì vultulonu à straziera e duie botte inde una fanga chì scutrava un pocu à st’ora di a ghjurnata. Intesu a fumata di a vinaccia, sò più di 200 i tedeschi chì li fecenu l’evvive è chì, tuttu cantendu, corsenu fora di a trincera à fà l’aiuta.

Cù i so uchjarelli neri, u futuru capitanu fidighjava cù e cannuchjale u spittaculu prumessu da Baccu mentre chì una vintina di mitragliose hotchkiss aspittavanu u signale di Provence pà rompe u silenziu di a tregua.

-Fooooooocu… mughjò Provence mentre chì inde l’infernu di a fuculiccia, chì ammazzava tuttu, nimu ùn sintì l’ironicu “…è bon natale à tuuuuuuti !!!!”.

Mancu una mez’ora dopu, à mezu à stu flagellu di carne smembrata è macinata, un stracciu perciu quant’è quellu di l’africani fù purtatu da una manata di bosci braccitesi chì avanzavanu da rendesi à i francesi.

- Chjamate u culinellu… !

Natale in furesta

Classé dans : Puesia corsa — 10 novembre, 2016 @ 10:53
Image de prévisualisation YouTube

Eramu a mane di u 24 di dicembre è cum’è tutti l’anni, l’animali di a furesta di u Valduniellu ùn parlavanu cà di l’affaccata di Babbu natale è di i rigali ch’elli bramavanu tutti in sicretu.

Ci eranu tutti : sumeri, parnice, cignali, lefre, mufre, ghjandaghje è tanti altri acelli migratori ghjunti da i paesi fritosi di u nordu di l’auropa. E biccazze, i culombi è i torduli a si scialavanu in a furesta isulana tantu più, chì quist’annu, u tempu era dolce assai. Par avà, ùn si parlava ancu d’invernà è ghjè cusì, chì par u piacè di tutti, i ricci è e ghjire eranu anch’elli à buleghju à l’altri animali. Par a so prima volta, eranu propiu cuntenti d’ùn mancà micca a festa di Natale è li tricava l’ora di pudè amparà anch’elli à signà l’ochju. U tempu era dolce, in fatti pudemu ancu dì ch’ellu facia u caldu (l’affare ùn dispiacia micca à e mosche è à e vespe) è tutti i ghjorni si parlava di questu «istate di San Martinu» chì paria d’ùn compie mai.
Cusì, cum’elli facianu sempre, tutti l’animali, zitelli, maiò è anzianetti, s’eranu accolti in a bocca à Verghju da appruntà a cena ch’elli avianu da sparte tutti inseme. Funzi, castagne, noce, aranci, bachi rossi è uva secca avianu da cuntintà à tuttu u mondu. À meza strada trà u mare turchinu di Portu è u fieru Monte cintu, era un locu apartu trà Niolu è Pumonte d’induva si pudia ammirà tante maraviglie isulane.

Ma, di pettu à l’aligria chì paria d’esse ginerale, in celu si vidia u volu calmu di l’altore chì s’avvicinava pianu pianu di a bocca. Ci vole à dì, chì a vigilia è u ghjornu di Natale, a pace si facia sempre trà tutti l’animali è a caccia era difesa. Ma l’altore era un acellu cunnisciutu par a so forza è a so vitezza è ùn hè senza pinseri chì tutti l’animali u fidighjavanu vulà sopr’à elli. Più andava è più l’altore s’avvicinava di l’animali, pianu pianu… in silenziu…senza fassi sente…
Dopu à una mez’ora, l’altore si n’era ghjuntu à appullassi à mezu à a bocca annant’à un isprone chì s’assumigliava à una statula maiò.

L’arghjetu u più arditu di a greghja s’avanzò da vede ciò ch’ellu vulia.

U mufrone : Salute o sgiò altore, cumu sè… a ti passi ?

L’altore : Iè micca male, è voi tuttu si passa bè ? Appruntate a festa di Natale ?

U mufrone : Iè a femu cum’è tutti l’anni. Ma… a sai chì a caccia hè difesa u ghjornu di Natale, certi di i nostri amichi si dumandanu….

L’altore : Ùn vi ne fate, ùn sò micca vinutu à vusticà ! Vi vulia privene di u tempu, chì da u celu, quassù, aghju vistu a bufeghja chì ghjunghje ! Sta sera, sì ùn mi sbagliu, pensu chì Babbu natale avarà i guai à truvavvi !

U mufrone si girò versi l’altri animali chì s’eranu accolti daretu à ellu par sente megliu e gattive nutizie di l’altore.

U mufrone : Amichi, sintite ciò ch’ellu ci dice l’altore, sta sera ci sarà assai fumaccia è Babbu natale risicheghja d’ùn truvà micca a so strada.

Tandu i pienti di i zitelli rimpiazzonu a paura di l’altore ch’elli avianu avutu prima è si dicia chì a festa era pà fiascà.

Una ghjira : Chì ghigna ! Par una volta ch’eramu ancu noi… Chì pudariamu fà ?

L’altore : Statemi à sente…aghju un’idea… Ci vole à cullà u più altu pussibule da fassi vede. Quassù in u Capu tafunatu ci hè un locu chì si vede da luntanu, quallà starete megliu.

U mufrone : Iè cunnoscu bè stu tafone chì tù dici ma hè assai luntanu da quì, cumu emu da fà par carrià tutta a nostra robba sin’à quallà insù ?

Un anzianu sumere : Noi a pudemu purtà ! Mettiteci ghjà tutta a robba annant’à u spinu è andemu prestu innanzu ch’ella ci pigliessi a bufeghja è a notte chì a strada sarà longa.

U mufrone : Aiò zitelli, accugliemu tuttu è insumemu prestu i sumeri.

L’altore : Aiò l’acelli, venite incù mè, emu da fà i passi è veni da a furesta à a muntagna da arricà assai legne, cusì pudarete accende un focu maiò da chì Babbu natale vi possi vede da luntanu.

In quattru è trè sette, tutti l’animali si messenu à u travagliu è, insumati ch’elli eranu, i sumeri piglionu a strada muntagnola di u Capu tafunatu daretu à una volpe chì prupose di falli a guida. L’altri animali accatastonu tutte e legne secche di a furesta d’Aitone da chì l’acelli ùn pirdissinu micca tempu à circalle. Ogni acellu di a furesta si purtava una legna in bizzicu è issendu unu à tuccà l’altru, stu volu infilaratu, da Verghju sin’à u Tafunatu, s’assumigliava à una parata militare cù l’altore, listessu à un ginerale, chì andava u prima !

U mufrone à l’altri animali : Avà andemu ancu noi, innanzu à l’annuttà, chì dopu ci emu da perde.

È trè ore dopu, ghjunti tutti, l’animali avianu stesu tutta a so robba in tornu à u fucone chì scaldava tuttu ognunu è alluminava da livante à punente cum’è un veru fanale.

L’altore : Eccu, avà mi ne possu andà, v’aghju da lascià…

U mufrone : Innò ! Sè u nostru invitatu, vai à circà quelli di a to famiglia è falli vene quì. Quist’annu emu da fà Natale tutti inseme è sparte tuttu ciò chì no avemu.

Avà, cù e rise è e canzone di tutti l’animali, stu tafone paria d’esse un core accesu in u pettu di a muntagna.
Sottu à elli, a bufeghja avia dighjà inguttupatu a faeta di a furesta ma tutti i zitelli, l’ochji à u cilente, circavanu à Babbu natale mentre chì un prima fioccu annunciava l’affaccata di l’invernu…

Hè ghjuntu l’annu novu (zitelli)

Classé dans : Puesia corsa — 8 janvier, 2016 @ 4:20

S’affacca l’annu novu
Hè ghjuntu pianu pianu
Par fà à u so modu
À ogni paisanu
A più bella prumessa

È sta prumessa l’hà
Fatta à passi ciatti
In e grande cità
In i paesi piatti
Cum’è una scumessa

Una scumessa chì
Pichjata à ogni porta
À tutti vole dì
È dilla un’antra volta
Pace è salute
Pace è salute à tutti

A pirula

Classé dans : Puesia corsa — 9 novembre, 2015 @ 12:49

Quandu era una canna senza arte inde un istagnu
Angusciata ogni tantu piinghjia u me distinu
Di vede cusì fieru u ceppu albitrinu
È tutte tramulate e vette di u castagnu

Cusì stavamu tutte i pedi inde u bagnu
Sempre à bazzicà di capu è di spinu
Trista sorte biuncata quandu u ventu mastinu
Vinia à puità à mezu à noi un lagnu

Ma un ghjornu una manu di natura fatata
M’hà sceltu è tagliatu di cultella arrutata
È à u parte feci à tutte u me licenziu

Dopu à un travagliu spertu m’hà resu ancu più bella
Fendu nasce e canzone in corpu à u me silenziu
È annannà zitelli à son di ciucciarella

Anfarte

Classé dans : Puesia corsa — 11 décembre, 2014 @ 4:42

À quellu omu chì gode e stonde cusì care
Di e merle chjirlendu e cantate giuiose
Senza pudè risponde à ste voce curiose
U ventu in u frundame calchì rimbeccu pare

Cum’è un celu immensu chì cutteghja u mare
Senza mai tuccà e so sponde graziose
Sempre mandi un’uchjata à e ninfe ritrose
Fendu ballà a luna annant’à l’onde pare

Quant’è lu sole porta u lume à i cristiani
Fascendu di carezze fureste è oceani
Porghji un ragiu di vita è d’amore dinù

Quant’è la musa rende a parolla à u mutu
È à l’innamurati sempre vene in aiutu
Canta à voce rivolta chì l’avvene sè tù

 

Prima premiu di u XXmu cuncorsu di puisia Lungoni

U liò di casinò

Classé dans : Puesia corsa — 7 juillet, 2014 @ 1:49

Era vennari scorsu in fine di sittimana
À fà duie pruviste – cusì bella cagiò  -
Innanzu di cullà biatu in Marignana
Mi feci un’arretta davanti à Casinò.
Chì u corpu cunnosce anch’ellu e so lege
È manda i filosofi tutti à fassi leghje !

Ma chì vulete fà, a vita hè cusì !
Sempre l’omu hà manghjatu par pudella campà,
È senza sbaglià nimu, eiu a vi possu dì :
Chì l’affare hè cusì eppo sempre sarà !
È dunque cù st’idea di fà calchì pruvista
Ch’in vittura appruntava in capu a me lista.

È mi dissi : « O Stè sarè tù cum’è l’altri
Sai bè ch’omu manghja da chì u mondu hè mondu »
È tandu mi cansai andendu à passi sgualtri
Murmurendu à mè stessu: « Ci sarà pocu mondu… »
Pigliai un carriolu è pienu di curagiu
Mi dissi : « Oramai sè ghjuntu in u vispaghju ! »

O parsona ! O li mei ! Ciò ch’aghju vistu quà
Carchi à ghjente aghju trovu tutti sti curridori
À chì curria quinci, à chì curria in là
Era un furmiculaghju in pienu corri corri
U fattu ch’e’ vidii mi paria irriale :
« O tuttu hè di rigalu o hè guerra mundiale ! »

Hè tandu ch’aghju pensu: « Avà chì tù ci sè
Saria un piccatu di parte senza nulla
Teni a to andatura, vai pianu o Stè,
Ch’ùn sè vinutu quì par insumà a mula ! »
È mi m’andai losciu à piglià duie suppe
Chisiendu l’assalti di tutte queste truppe.

Ma a più bella hè stata, di pettu à stu casticu,
Quandu aghju dettu : « Avà, fideghja ùn sè più solu ! »
Quandu in u curridore cintrale un amicu
Sbuccò sguasgi à cascà in u me carriolu.
« Salute !… » li feci. « …Allora a ti passi ? »
Ma dighjà ellu avia fattu centu passi.

Paria un satanassu, ci vulia à vede
Cù u so pacchittellu di lisciva in manu
Ellu parlava sempre – andendu annant’à un pede -
Ma ùn sintia nulla chì troppu era luntanu :
 » ..chjamatu…tempu…cascia…paese…vinu.. »
È andate à capì quellu chì vi dà spinu… !

Sò statu à bocca aparta durente un bellu pocu
Di vedelu cusì intintu di sudore
Dicendumi : « U tosu curria cum’è un focu. 
Ùn a sà chì u tempu ci manda à u Signore ? »
Vargugnosu hà chjamatu dopu à questa passata
È m’hà dettu : « Ùn dì nulla è ti facciu a bucata ».

Ma ùn possu stà zittu davanti à tante prove
Chì dopu intornu à mè avia i turisti. 
« In fatti di cumissione stu tippu hè un lione
È oghje i so talenti tutti l’avemu visti ! »
Parlendu disse unu di u me amicacciu
Allora a me canzona – ch’era prumessa – a facciu.

Isulanità

Classé dans : Puesia corsa — 19 mai, 2014 @ 8:32

Catene immatiriale
Chì a Matre tarrania
Sumena à volu d’ale
Inchjustrendu a muntagna
À signe porte aparte
Di u miditarraniu

Andassine o stà ?
Isulanità !

Ghjargalu cantarinu
Di a fonte suprana
Chì ricusa u camminu
Chì sempre l’alluntana
À son di bangagliacciu
Da u miditarraniu

Quinci o da mare in là ?
Isulanità !

Distini scunnisciuti
Di tante mosse umane
Di tanti omi partuti
In brama di dumane
Ma chì di core stonu
In u miditarraniu

Fior di l’eternità !
Isulanità !

Lamentu par Urfanella

Classé dans : Puesia corsa — 12 décembre, 2013 @ 10:01

Questa notte m’arricordu
Di sti sonnii cusì strani
Mi paria un abbaghju
Chì mi dava tanti affanni
Quant’è ch’ellu mi dicessi :
Fetta hà tombu i to cani

D’avè saltatu u fossu
Ùn u cridia capace
Ma sò corsu à u canile
Ch’ùn pudia dorme in pace
È tempu à ghjunghje quallà
L’aghju trovi in tarra à ghjace

Sè pà more u me Culombu
È sè morta a me Finetta
Chì par offende u patrone
U me cuginacciu Fetta
V’hà culpitu à tradimentu
Di notte nanz’à l’albetta

Incù voscu à cacciaghjà
Eiu ci andava ancu solu
A prima era una campana
È quill’altru u battagliolu
Bellu coppiu rinumatu
Da u Sia à u Niolu

Ma avà a cacciamossa
Capiscu ch’ella hè finita
Chì l’assassinu di forca
M’hà cacciatu gioia è vitale 
Fendu nasce in u me core
Una pena infinita

Me cuginu stu banditu
Hè di razza mischinella
D’avè attuscatu a cagna
Ch’allivava una catella
Chì par sempre u so nome
Avà sarà : Urfanella

Vularia u furdanu
Chì v’hà lampatu u buccone
Impiccallu in campanile
Cù u ventu stu pisone
Ch’ellu passi a so morte
À sunà u campanone

Appiccata à a so cullana
Rimpiazzà vogliu a croce
Da un istile arrutatu
Pà taglialli fiatu è voce
Fendu corre u so sangue
Cum’è funtana chì sorge

Pà purtà questa vindetta
Altru nimu ùn ci sarà
Chì u me caru figliolu
Vole a surella spusà
È l’anellu ch’ellu brama
Ùn u vole insanguinà

Cum’è s’ella era u me sangue
Purtà vogliu i neri panni
È cù l’aiutu supranu
Ancu avendu uttanta anni
Tengu lu fucile incrochju
Par vindicà i me cani

Tintu di mè Urfanella
Chì li to parenti hà tombu
Ma ti facciu a prumessa
Di falli tuccà u piombu
Par ùn sente u rimbeccu
Di Finetta è di Culombu

A me scola (zitelli)

Classé dans : Puesia corsa — 15 septembre, 2013 @ 9:34

Quandu una grillachja
Sorte da a machja
Cù una ghjallina
È a so cartina,
Vecu un vulpone
À u tavulone
Dì à i sumeri:
« Fate i duveri »
Avà tutti sò à tola
Cusì bella a me scola

Fatta à scala (zitelli)

Classé dans : Puesia corsa — 20 août, 2013 @ 10:47

M’arricordu chì cullava
Una scimia à biccicletta
Da ciò ch’ella spatansciava
Si ne facia l’anchetta

Chì… …
Da a piaghja à a muntagna
In a cullata si lagna
Ma da e cime à a piaghja
Santa falata… tuttu viaghja!

Crosciu intintu di sudore
Incù e so bracce in croce
Appress’à e capre un pastore
Ne pirdia fiatu è voce

Chì…
Da a piaghja à a muntagna
In a cullata si lagna
Ma da e cime à a piaghja
Santa falata… tuttu viaghja!

Figliulellu di sta tarra
Duve si colla o si fala
Sappia ch’ella hè a più cara
Cursichella fatta à scala

Sappia ch’ella hè a più cara
Cursichella fatta à scala

Ancu sì…
Da a piaghja à a muntagna
In a cullata si lagna
È da e cime à a piaghja
Santa falata… tuttu viaghja!

À Ghjuvan Petru

Classé dans : Puesia corsa — 29 avril, 2013 @ 9:04

À Ghjuvan Petru dans Puesia corsa telechargement-e1367934906949

 

 

eze1 dans Puesia corsa
numari117

 

 
Di l’amandulu u fiore
Ùn sò cà duie e stagione
Ma mi piace oghje à albore
D’avè in manu u librone
Rigalatu cù u core
Da Ristori u puitone

Di risponde à questu amicu
Sempre a vulia fà
Ma u parlatu di Vicu
Par pudè scrive è cantà
Era calcosa a ti dicu
Prima à ammaistrà

Ch’ellu sia salutatu
Quellu di A Riventosa
Chì u tempu aghju pigliatu
Par risponde à a so improsa
Ma avà sò ingrandatu
È possu impinnà calcosa

Face un paghju d’anni fà
Chì mi cunsigliasti in rima
È di stu fattu o cumpà
Ti portu una grande stima
Chì in Corsu allettu avà
Cane, sumere è bima

Di u mio caru paese
Batte in pettu a ciccona
È ùn si passa un mese
Senza chì a mio parsona
Cù e duie arechje tese
Ùn ascolti a so canzona

Sappia chì di babbu è mamma
Aghju intesu e canzone
A paghjella è a nanna
Sò state e prima lizzione
Par cunnosce calchì rama
Di a nostra tradizione

Vedi bè chì i to cunsigli
I m’aghju pigliati tutti
È u chjassu chì tù pigli
Duva i versi ùn sò sdrutti
Trà i fiori è i stigli
Hà datu i più belli frutti

Incù una fede eterna
È a to penna sè mossu
Dendu a voce fraterna
Di u pueta in rinforzu
À a me vita muderna
Ma chì t’hà u stintu corsu

Par e future canzone
À a to musa diletta
Sapendu chì u me nome
Poche rime ellu accetta
Li facciu a sugistione
Di fallu rimà cù Filetta 

 

Leandru

Quelle chì vanu

Classé dans : Puesia corsa — 12 mars, 2013 @ 4:02
Image de prévisualisation YouTube

 

Didicà vogliu ste strufate
À tutte e donne amate
Dolci mumenti chì omu hà
À quelle cunnisciute pocu
Chì a sorte face mutà locu
È ch’ùn pudemu ritruvà

À quella chì cum’è un acellu
Stà una stonda à u purtellu
È chì più prestu si ne và
Ma u so galbu graziosu
Cusì bellu è cusì pumposu
Sempre l’ochji face spannà

À a cumpagna di viaghju
Chì u sguardu dolce paisaghju
Ci face u camminu accurtà
È ancu par esse capita
Da voi luntanu hè fughjita
Senza una manu carizzà

À quelle chì ghjà sò pigliate
Campendu ore poche sebbiate
Cù quellu chì cambiatu hà
Vi lascianu cù nustalgia
Vede tutta a malincunia
Di un avvene senza sperà

O care maghjine illuse
Spiranze di un ghjornu diluse
Dumane ùn sarete più
Chì quandu omu scontra l’amore
Tandu spessu si scorda u core
Di ciò chì arimane fù

Par avè sbagliatu a so via
Sunniemu incù un’oncia d’inviglia
Ramenti di a giuventù
Un basgiu ch’ùn s’hè fattu sente
I cori ch’aspettanu sempre
È l’ochju ch’ùn s’hè vistu più

A sera davanti à u focu
Quandu cum’è un rimitu stocu
Ricordi di i tempi fà
Si pienghje e labre assente
Di tutte ste belle passante
Svanite avà di core in là

D’appressu à una puisia d’Antoine Pol

Ci vole u pueta

Classé dans : Puesia corsa — 15 octobre, 2012 @ 9:36

Ci vole u pueta, fattu d’ombra è di lume,
Alma cheta è alegra o ingrussatu fiume,
Ch’ellu sia in mossa, cù a deda, u prima.
Anfarte mistiriosu, intesu incù stima
Da e donne, l’arbasgi, i savii è i rè,
À tutti, a so tirzina arreca u piacè.
È quandu omu ascolta, trà sonniu è nustalgia,
Un’arrietta materna di calchì puisia,
Chì annanna, chì basgia, imbriaca è carezza,
Diventa ancu a suffrenza un nidu di dulcezza
Chì pone in u disertu a sumente di un fiore
È in u celu foscu un istellu in culore
Chì farà cantichjà, di gode stonde belle,
L’amore, a spiranza, acelli è pisciarelle.
In a gioia sirena è i pienti stanciati,
Ogni tantu, ci vole, à l’omi spavintati,
À sente u scatinime, inde a notte bughja,
Di un filare chì, stridente, civra è mughja.
Ci vole u pueta, cù a musa in aiutu,
Ch’ellu sia un valdu frescu, calmu è frundutu,
Cù u ventu chì face, in e rame, e canzone,
È induva, à l’assaltu, prontu stà un lione.

 

(d’appressu à una puisia di V.HUGO)

Ghjallinuccia (zitelli)

Classé dans : Puesia corsa — 13 septembre, 2012 @ 9:01

Ghjallinuccia sarà vera ?
Dimmi ghjallinuccia nera.
L’ovu chì tù teni à fiancu
S’ellu hè neru o s’ellu hè biancu ?

Ghjallinuccia ùn mi sbagliu
U to capu hè tuttu giallu.
Ma l’ovu chì t’ai à fiancu
Dimmi s’ellu hè giallu o biancu ?

Ghjallinuccia sempre in mossa
Dimmi ghjallinuccia rossa
L’ovu chì tù teni à fiancu
S’ellu hè rossu o s’ellu hè biancu ?

Ghjallinuccia mai stanca
A sò ghjallinuccia bianca
L’ovu chì tù teni à fiancu
Sò sicuru ch’ellu hè biancu !

Ochju

Classé dans : Puesia corsa — 7 août, 2012 @ 8:45

Ochju  dans Puesia corsa bois_l14

U tempu arriviglia a legna turcata
Chì di l’istate ùn cunnosce a stella
Pare a curteccia cusì stantarata
Chì ogni vetta diventa urfanella

Onda suchjosa di speme ribella
Quandu incù maghju a fantasia hè nata
Ghjunsi pà rende a vita più bella
È fà un affrontu à quella invernata

Ma a natura hà scrittu ogni cosa
È cusì hè da chì u mondu hè mondu
Sempre u sirenu u s’aspetta un sprufondu

L’onda turchina hè firmata graziosa
Ma l’ochju chì di l’amore era natu
Anch’ellu oghje s’hè addurmintatu

Ammancu

Classé dans : Puesia corsa — 5 mai, 2012 @ 9:22

Quandu u nulu furdanu
Impasta calchì timpesta
Eppo ingutuppa pianu
Ogni sarra di a furesta
Sempre mi manca di tè
A to prisenza cilesta

Quandu a notte d’invernu
Tende un filare fritosu
Sottu à i stelli à caternu
In u celu bughjicosu
Mi manca assai di tè
U to ochju luminosu

Quandu hè longu u caminu
Di a spiranza sbagliata
Ma ch’in altrò u distinu
Sempre face un’affaccata
Spessu mi manca di tè
A to manu dilicata

Quandu a vita hè crudele
È a strada straziata
Muchendu l’alma è a pelle
Di a ghjente disgraziata
Torna mi manca di tè
A to voce inzuccarata

Quandu a sorte mischina
Di mè t’hà alluntanatu
È chì di a zitillina
Ogni fiore hè siccatu
Quantu mi manca di tè
U to core innamuratu

Sonniu

Classé dans : Puesia corsa — 15 avril, 2012 @ 9:01

Quale sò ?
Sò liberatu
Ma mi sentu assaltatu.
Di tutti sò a preda, a primura,
Piengu, sò spavintatu ma puru stò.

Cum’è un galbu di natura
Sunniatu tantu è troppu
Avà bramu incù stu corpu
Di campà calchì viaghju
Nant’à a quessa cambratura

Fideghju à u cilente di un istellu u ragiu
È m’incanta u surrisu spannatu di a luna
Chì palesa à u mondu cusì grande furtuna
Di gode signe stonde chì pone parè corte
Quandu à u fà di u sole un pintimentu aghju

À l’alba di a morte
Di pettu à mè stessu
Mai ùn sarà listessu
U riame avà
Chì m’apre e so porte
Sarà sonniu o virità ?

Ciriola (zitelli)

Classé dans : Puesia corsa — 4 mars, 2012 @ 9:04

Ciriola (zitelli) dans Puesia corsa image1-300x198

Ciriola ciriola
Sempre vistuta di rossu
Ciriola punti neri
Dimmi quantu n’ai addossu ? 

N’ai unu dui è trè
Questi i contu cum’è tè
N’ai quattru cinque è sei
Ma questi quì ùn sò mei
Dopu cinque sei è sette
Ottu sarà par prumette

Cincinella cincinella
Punti rossi ùn ne hà mai
Cincinella punti neri
Dimmi quant’è tù ne ai ?

N’ai unu dui è trè
Questi i contu cum’è tè
N’ai quattru cinque è sei
Ma questi quì ùn sò mei
Dopu cinque sei è sette
Di più ùn ne poi mette

Spusatella spusatella
Fammi questu u piacè
Spusatella punti neri
Dimmi quant’ellu ci n’hè ?

N’ai unu dui è trè
Quessi i contu cum’è tè
N’ai quattru cinque è sei
Ma questi quì ùn sò mei
Dopu cinque sei è sette
Ottu sarà par prumette

Ciriola ciriola
Avà ùn ne possu più
Ciriola punti neri
Dimmi quantu n’ai tù ?

N’ai unu dui è trè
Questi i contu cum’è tè
N’ai quattru cinque è sei
Ma questi quì ùn sò mei
Dopu cinque sei è sette
Di più ùn ne poi mette

 

U valdu musa

Classé dans : Puesia corsa — 31 janvier, 2012 @ 8:01

Più fronde nè acelli
Inde u valdu musa
È semu urfanelli

Piovanu mille piume
Cum’è l’acqua pueta
Chì pienghje in u fiume

Ma finita a statina
Inde u valdu musa
Cù sguassaghjola è mina

Piuletta è curagiu
Sempre l’omu capeta
Par dacci un novu ragiu

 

D’appressu à una puisia di H.E. Dayssol

L’arburu pueta

Classé dans : Puesia corsa — 1 décembre, 2011 @ 4:26

L'arburu pueta dans Puesia corsa chataigne1

Mi piaceria à fà à l’usu di un scrivanu

Un puema inuratu d’albore sittimbrinu

Truvendu e parolle cum’è l’alburi danu

Ricchezza è pilone par veste ogni camminu

 

Arricoglie in sicretu l’inchjostru castagninu

È fanne un suchju d’oru chì corre inde a manu

Di quellu par amore chì cambia u distinu

Scrivendu i ricordi di un tempu luntanu

 

Tamanta la disgrazia maladettu ch’e socu

Di truvammi spugliatu da nuvembre sfrundatu

È d’avè u me ceppu da i mei squarratu

 

A me ultima risa di misteru è di lume

Cù l’adore turchina piacente di u fume

Sarà senza rancore di dalli fiara è focu

Ritrattu di Dominique Tison


A pichjarina (zitelli)

Classé dans : Puesia corsa — 18 juillet, 2011 @ 3:50

A pichjarina (zitelli) dans Puesia corsa sittellecorsejfseguin

Sempre una pichjarina
Cantichjava incù piacè
Quella muntagna turchina
Duva u larce hè lu rè

Di stu locu lu splindore
Cum’è a so natura vole
Zifulava da l’albore
À u ciuttà di u sole

A natura ginarosa
Di maghju lu vinti trè
À l’acella graziosa
Piuconi n’hà datu trè

U prima disse o mà
Cusì maiò a pianeta
U prima disse o mà
U mondu vogliu vulà

Vularè o figliulè
A pianeta cusì bella
Vularè o figliulè
S’ellu hè quessu u to piacè

U sicondu disse o mà
Tanta ghjente in paese
U sicondu disse o mà
Campà vogliu in cità

Camparè o figliulè
In a cità a più grande
Camparè o figliulè
S’ellu hè quessu u to piacè

U terzu disse o mà
Inde a nostra furesta
U terzu disse o mà
Par sempre ci vogliu stà

Ci starè o figliulè
Inde ‘ssu locu biatu
Ci starè o figliulè
À cantichjà incù mè

 

D’appressu à un’idea di Gregale

 

 

Mulinellu (zitelli)

Classé dans : Puesia corsa — 18 juillet, 2011 @ 3:47

Quandu chì a to manuccia
Per mè face un mulinellu
Mulinellu mulinellu
Mossu cù lu vintulellu

Cum’è a fronda chì vola
Mossa cù u vintulellu
Mulinellu mulinellu
Scopri u mondu u più bellu

Parti per fà un viaghju
Ind’è u mondu u più bellu
Mulinellu mulinellu
Lampendu fiori in u celu

Quandu si piglia a notte
Tutti ‘ssi fiori in u celu
Mulinellu mulinellu
Luciccheghja qualchì stellu

Avà stringhji e to mani
Sunniendu ad ogni stellu
Mulinellu mulinellu
Dormi caru anghjulellu

Musicale

Classé dans : Puesia corsa — 31 mai, 2011 @ 10:56

Ogni focu oramai
Cù a musica chì và
Sott’à i stelli assai
Face u paese campà
Cantendu u benistà
Di una vita fatta à LA

Quandu fisca a zilifrina
In e fronde piligrine
A carezza sittembrina
Viulineghja e so rime
Par a manfarina fà
Di una vita fatta à FA

E stagione musicale
Stà à sente o giuventù
FA DO RE LA FA DO RE
Sta canzona universale
A cunnosci ancu tù

S’addurmenta a muntagna
È li sussura a neve
Ch’ella hè trista la campana
Chì chjucchitteghja in a pieve
Tutti i ramenti chì sò
Di una vita fatta à DO

Fresca è schietta cum’è l’onda
Di a spiscia viranile
Un’arietta vagabonda
Corre in i fiumi d’aprile
Camminendu u piacè
Di una vita fatta à RE

A notte

Classé dans : Puesia corsa — 20 avril, 2011 @ 8:40

Notte
Di silenziu vistuta
Ti sentu affaccà
Per pigliammi a manu
È fatti cusì dolce
Chì mi pare di sente
Vicinu
U rispiru di a morte

Sete voi

Classé dans : Puesia corsa — 16 avril, 2011 @ 11:20

Sete voi dans Puesia corsa y1pmsaltd1coxtxd37ntprjywdjqfxumopieaww7pfrarnxeecuws8fqr27ocg1r8dxskdbvk9h8

Un fiore di l’elpale senza prunu nè spina
À l’entre di farraghju hè ghjuntu in a stridura
Cum’è un pinnellu chì à mezu à a natura
Sfrisgia sette culori trà muntagna è marina

Ardente un istellu di l’alba matutina
À u sorte di marzu luccica in a bughjura
È mette una candela inde ogni scultura
Da i seculi fatta in a bianca calcina

Sete voi innucenti di dumane a speme
Par fà chì stu battellu di navigate sceme
Ritrovi à l’orizonte u stellu di a vita

Sete voi candidi di l’avvene a sfida
Par fà chì Cursichella inde un antru albore
Offri à i so zitelli u fiore di l’amore

 

À Elia è Leandru

U cuccu (zitelli)

Classé dans : Puesia corsa — 13 mars, 2011 @ 6:25

U cuccu (zitelli) dans Puesia corsa 58929798coucougrisredu2gjpg

Cuccù cuccù
U cuccu in a furesta
Cuccù cuccù
Hè ghjuntu par cantà

Hè ghjuntu par cantà
U cuccu u cuccu
Hè ghjuntu par cantà
Par cantà u viranu

Cuccù cuccù
Hè ghjuntu u viranu
Cuccù cuccù
Sta mane in a furesta

Sta mane in a furesta
U cuccu u cuccu
Sta mane in a furesta
Ci canta u viranu

Cuccù cuccù
Ci canta u viranu
Cuccù cuccù
Quassù in a furesta

Hè ghjuntu in a furesta
U cuccu u cuccu
Hè ghjuntu in a furesta
È canta u viranu

A lumaca… (zitelli)

Classé dans : Puesia corsa — 8 mars, 2011 @ 11:58

…chì si vulia marità cù un istellu

A chjar’ di luna
Una lumaca
Sempre ci andava
A spassighjà

Disse a volpe
A ‘ssa lumaca
Induve tù
Ti ne voli chjappà?

E li rispose
A lumaca
U mondu sanu
Socu pronta à girà

A chjar’ di luna
Una lumaca
Sempre ci andava
A spassighjà

Disse un ciocciu
A ‘ssa lumaca
Induve tù
A ti voli piglià?

E li rispose
A lumaca
Quassù in celu
Mi ne vogliu andà

A chjar’ di luna
Una lumaca
Sempre ci andava
A spassighjà

Disse un cignale
A ‘ssa lumaca
Cun quale tù
A ti voli scappà?

E li rispose
A lumaca
Hè un istellu
Ch’e mi vogliu spusà

A chjar’ di luna
Una lumaca
Sempre ci andava
A spassighjà

Disse un ricciu
A ‘ssa lumaca
Qualchì rigalu
A li voli purtà?

E li rispose
A lumaca
Li vogliu tuttu
U me amore dà

E ‘ssa lumaca
A chjar’ di luna
Sempre ci và
A spassighjà

 

 

 

Una notte incù tè

Classé dans : Puesia corsa — 7 mars, 2011 @ 10:45

Una notte incù tè dans Puesia corsa jy7piuui

U core hè un misteru è a mente un sicretu
È ciò ch’ùn hè capitu arreca a paura
Ancu u più curagiosu face un passu in daretu
Quandu chì a parsona ùn hè micca sicura

Un fiore dilicatu hè natu in a friscura
U pigliu inde e mani ch’ellu ùn pati u fretu
Hà trovu un agrottu a so frolla natura
Par fà chì farraghjettu par ellu sia chetu

Quandu passemu inseme una nuttata in biancu
T’annannu inde ste bracce ch’e trovu sgalabate
Ma godu ogni stonda di surrisi graziosi

Spartendu à voce bassa e più dolce cantate
Cù passione fideghju i to ochji curiosi
Chì sò scemu di tè è ùn a sai mancu

Leandru

Classé dans : Puesia corsa — 21 février, 2011 @ 9:51

O Leà u me Leandru
Sì tù senti quella chjama
Sia ne puru sicuru
Ch’elli anu forte brama
Di fatti scopre stu mondu
U to babbu è a to mamma

A nature capricciosa
Ci hà cacciatu di l’affannu
Quandu u nove di farraghju
In avanzu lu viranu
Ci hà purtatu i to ochji
Eppo tesu a to manu

Ai impiutu a nostra casa
Cum’è u più bellu fiore
È di surrisi biati
Ai impiutu u nostru core
Fendu chì par ogni ghjornu
Ti daremu u nostru amore

U screnu

Classé dans : Puesia corsa — 19 février, 2011 @ 7:35

U screnu dans Puesia corsa echo1

Tal di Diana u lume à u sirenu
Inde a notte hè sbucciatu un fiore
Vinutu à l’alba par facci un cennu
È sparte una stundarella d’amore

Scupremu trà timore eppo stupore
Di a natura u più altu geniu
Quandu si mette à batte u core
Incù frullezza annant’à lu screnu

Pare un istellu russicciu è luntanu
Lucendu à mez’à una strada di Roma
Chì d’un zitellu hà pigliatu a forma

À ‘ssu cilente s’aisa una manu
È in cuntrastu si mira u so capu
Par a fiertà di una mamma è di un babbu

Nasce a vita

Classé dans : Puesia corsa — 18 février, 2011 @ 9:15

Nasce a vita dans Puesia corsa femmeenceinte1profil2

Quandu l’alba di ‘ssu mondu
Pare un fuculaghju appesu
Ogni capigliolu mondu
Mira u nivulu accesu
Eppo canta a piuvita
Chì face nasce a vita

L’acqualime di u fiume
Corre in alta muntagna
Trà a petra è u lume
Par truvassi una cumpagna
Fendu una corsa scimita
Da innamurà a vita

Tale u fiore paradisu
Di l’amandulu fiuritu
Cusì bellu u surrisu
Nant’à e labre sculpitu
Di a donna insignurita
Chì porta in ella a vita

Par tè

Classé dans : Puesia corsa — 16 janvier, 2011 @ 7:19

Par tè dans Puesia corsa mainenfant

Vogliu una filetta pone
Chì tù ùn ti ne scordi mai
D’avè l’andatura degna
Eppo fiera di ‘ssu locu

Vogliu una scupiccia pone
Chì tù ùn aghja u fretu mai
Incippendu in u focu
Una tama di ‘ssa legna

A sumente di a vita
Posta l’avemu par tè
È par falla più fiurita
A manu ci poi dà
Par sapè ind’ella hè
È campà ind’ella stà

Un pullone vogliu pone
Chì tù ùn aghja a fame mai
Stigliendu sottu à i stelli
I frutti d’ogni russore

Un chjarasgiu vogliu pone
Chì tù ùn aghja in core mai
A vinice di l’amore
Quandu cantanu l’acelli

A sumente di a vita
Posta l’avemu par tè
È par falla più fiurita
A manu ci poi dà
Par sapè ind’ella hè
È campà ind’ella stà

I sturnelli

Classé dans : Puesia corsa — 3 janvier, 2011 @ 11:34

I sturnelli dans Puesia corsa 335letourneausansonnetsturnusvulgaris

Quandu a stagione si face mischina
À u sirenu li caccia un pernu
S’alluntaneghja cusì a statina
È incun ella u rossu eternu

À l’attrachjata calma è purpurina
Di a natura è di u so guvernu
Hè un miretu inde l’aria turchina
Quand’ellu si mette à ballà l’invernu

Sò ghjunti cum’è un istracciu di nebbia
È l’orizonte avà pare una seppia
Pronta par calchì polcà mistiriosa

È sì a musica hè silinziosa
Inturchjulatu u so ballu pumposu
Hè di a sera lu più maistosu

Lamentu di u trenu

Classé dans : Puesia corsa — 26 novembre, 2010 @ 8:24

Lamentu di u trenu dans Puesia corsa ajacciob

U trenu di a Bastia
Dighjà hè statu cantatu
È par fà tace i canti
Annu l’anu rimpiazziatu
Ma quellu ch’hè statu sceltu
Ùn hà tantu viaghjatu

Chì ne pensi o Anghjulinu
Di u pocu chì s’hè vistu
U trenu ch’elli anu compru
Ùn hè statu un bellu acquistu
Pocu l’hà pigliatu u Corsu
È mancu appena u turistu

Quelli chì t’anu u putere
Compranu senza ghjudiziu
U trenu avà stà in gara
Parch’ellu hà calchì viziu
Ci saria à dumandassi
S’ellu hè veru o fatticciu

A canzona di l’eletti
Ùn era micca una fola
A spulera sempre u soldu
Sorte di a vulpaghjola
Ma u trenu sin’à Corti
Nè ci fala nè ci colla

U trenu stà in Aiacciu
Bellu spostu à u sole
Chì di fallu viaghjà
Avà più nimu n’ùn vole
Ch’ellu si rode i freni
Cum’è a lana e tignole

U trenu hà custatu in veru
Tuttu l’oru di a Spagna
Ma ùn hè ghjuntu à spessu
In e gare di Balagna
Cusì ci tinemu l’oliu
Par cacciacci ogni macagna

Di quellu chì dicerà
« A Vizzavona hà francatu »
Avaraghju da pinsanne
Chì u tosu hà sunniatu
È s’ellu ùn durmia micca
O hè cecu o hè bugiardu

In paese di Cervione
Ùn u fate più u forte
Chì di ghjunghje ind’è voi
Mai ùn sarà a so sorte
Parchì e muntagne corse
L’anu cundannatu à morte

Sbarcanu à battellate
Ind’è noi i ghjurnalisti
Chì l’affare di u trenu
Purtatu da i turisti
À tutti pare una burla
U techju ùn crede i famiti

Trinichellu o trinichellu
Ai fattu a to vindetta
È ch’ellu t’hà supranatu
Mai ch’ella sia detta
Ma un trenu par l’avvene
Quantunque ognunu l’aspetta

Furtunatu quellu ghjornu
U tinaremu à mente
Ch’avaremu par i Corsi
Un trenu novu framente
È lu nostru trinichellu
In gara starà cuntente

Ùn sò micca maldicente
Ancu di menu induvinu
Ma pigliata a ritirata
Stattine puru vicinu
Chì di ripiglià a strada
Sarà forse u to distinu

Anghjulì o Anghjulinu
U me cantu compiu quì
Senza pinsà chì a rima
Cambiassi a storia chì
Sempre hè stata eppo sarà
Baccalà pà Corsica

Stelli

Classé dans : Puesia corsa — 18 novembre, 2010 @ 2:53

Stelli
Di pueta
Par fà nasce li canti
Disciuglite e pastoghje
Di a musa sicreta

Stelli
D’arimane
Chì luccicate oghje
Purtate à l’amanti
Un lume par dumane

Stelli
Antenati
Da chì u mondu hè storia
Versi e notte bughje
L’omu hà l’ochji pisati

Stelli
Di a mente
U vostru nome fughje
È a nostra mimoria
Senza lingua si pente

Nuvembre

Classé dans : Puesia corsa — 9 novembre, 2010 @ 9:59

Nuvembre dans Puesia corsa img0152

Prontu l’invernu affacca à a mutesca
Sapendu chì sarà prestu a so ora
Quandu u gricale a notte rinfresca
Mancu l’amanti ùn tardanu fora

Tandu nuvembre appronta a sesta
A lana rossa, a gialla è a mora
À a natura li cambia la vesta
Par a so ultima stonda di gloria

È ogni fronda cusì culurita
A farandola incù lu ventu face
Par scopre in ballu a so invistita

U prima fioccu risplende in a cima
È prestu la fisticciola si tace
Chì a furesta si fascia a bianchina

Lamentu di u sunadore

Classé dans : Puesia corsa — 16 octobre, 2010 @ 7:37

U mio paese
Viculellu d’amore
Duva sò natu
À l’alba di un fiore
Aghju stantatu u pane
À l’usu di u pastore
È fattu ballà a ghjente
Cù l’arte di u sunadore

Quandu à l’appiattu
Andava zitellettu
Incù timore
À piglià l’urganettu
Par carizzallu di ditu
Eppo stringhjelu di pettu
Sunniava chì un ghjornu
Sunaria di sunettu

Sò ingrandatu
È di forte statura
Vulsutu aghju
Campà in a natura
Passendu filice stonde
U ghjornu in a pascura
È a sera à u fucone
À sunà incù primura

Cù e mio capre
Trà piumbone è ghjinestra
A mi scialava
Battendu ogni cresta
Ma quandu ciuttava u sole
Riintriu à a lesta
Chì a sopracena era
L’occasione di fà festa

U me sunettu
Amicacciu fidatu
Tante masurche
À perdene u fiatu
Quandu annant’à a piazzetta
U ballu era cuminciatu
Ogni zitella biata
Bramava un innamuratu

Ma per disgrazia
I tempi sò cambiati
Tutti l’amanti
Luntanu sò scappati
Hè stramurtitu u fiore
In i capelli lisciati
È u silenziu rimpiazza
Quelli valsi passiunati

Caru urganettu
Strumentu tralasciatu
Di e polcà
Ognunu s’hè scurdatu
Ch’avaraghju più da fà
In stu carrughju amatu
Solu à stammine quì
Tantu afflittu è scunsulatu

Aghju passatu
E più sebbiate ore
È di sta vita
Ringraziu u Signore
Ma li facciu a dumanda
Ch’ellu mi mandi à l’albore
Una morte musicale
Par piace à u sunadore

Sittembre

Classé dans : Puesia corsa — 15 septembre, 2010 @ 7:15

Sò di u sole sittembrinu
Chì pone e so labre
Nant’à a pelle inurata
Di a natura firita
Quandu a fronda arrussisce
E carezze di l’aria

Sò di u lume sittembrinu
Chì porghje una manu
Nant’à u corpu fritulosu
Di a sarra adurmintata
Quandu a frisculina corre
In u spechju di l’albore

Sò di l’acqua sittembrina
Chì scandilleghja a manna
Nant’à a e lenze ginarose
Di i chjosi abbandunati
Quandu l’auturnu sorge
Tale una vasca muntagnola

U rimbeccu

Classé dans : Puesia corsa — 1 septembre, 2010 @ 1:24

Nant’à e petre adumbrate
Di e case abbandunate
U silenziu impatrunitu
Face sente u so stridu

Tale un anticu rimorsu
U fretu sciacca un morsu
È ughjula un rimbeccu
À e ziglie senza steccu

Par ùn accittà a sorte
Una vichjarella sorte
Cù u so neru scursale
À pusà nant’à u mutale

Stà à circà in u celu
U cennu di calchì stellu
Chì spiecharia parchè
U distinu hè cum’ellu hè

È ancu par esse sola
Senza dì una parolla
Si ne stà in u currente
Pinsendu à a so ghjente

Oramai hè citadina
Quessa risa zitellina
Chì curria in u carrughju
Da a mane à u bughju

Ma quandu ? Quandu sarà
Ch’elli anu da vultà
Incù quella antica brama
Di tene caru una mamma

Nant’à e petre adumbrate
Di e case abbandunate
Scunsulata si n’hè morta
Sola davant’à a so porta

A candela

Classé dans : Puesia corsa — 2 août, 2010 @ 12:45

A candela dans Puesia corsa candla

Dolce cumpagna di falu biancore
Chì porta a pace di un antru albore
Torna una volta fideghju a luce
Quandu a sera u culore sfughje

In u silenziu di e notte bughje
Cum’una sfiera a cera chì sdrughje
In a candella framette u chjarore
È u ramentu chì u tempu corre

A vita hè listessa à la candela
Quandu a fiara cunsuma a miccia
Allumineghja è dopu sparisce

Nant’à i muri un’ombra s’appiccia
È di cuntrastu a stanza fiurisce
Balla in lume è si spenghje anch’ella

Stonda

Classé dans : Puesia corsa — 11 juillet, 2010 @ 11:18

Hè vinutu l’anfarte cù a musa surella
Par puità u ghjornu di speme cusì bellu
È prontu à fassi sente incù una cialamella
S’ellu avia u cantu listessu à un acellu

Hè vinuta a ninfa sicreta fiacculella
Par scopre di a notte u mondu cusì bellu
È pronta à fassi vede incù calchì candela
S’ella avia u lume listessu à un istellu

Si sò spenti l’abrochi dopu à ogni albore
È più cà un urchestru aghju intesu i strumenti
Cà un fanale forse vistu ogni lumera

Ma a luna d’istate risplende à u cilenti
È u silenziu sguassa u passu di a sfiera
Quandu mi nasce in pettu u fiore di l’amore

Lamentu di a pescia

Classé dans : Puesia corsa — 7 juin, 2010 @ 5:35

 Lamentu di a pescia dans Puesia corsa photo017

A pescia Corsa
Hè statu u me cugnome     
Par quellu chì
Battia u rughjone
Eru in alta muntagna
A gemma di u rione
Chì saltava à a mosca
È civrava u buccone

Passava eiu
E più filice stonde
Quandu l’istate
Ballava incù l’onde
Imbriacata d’amore
Di vede e fiurite sponde
Ghjucava à e piattatelle
Trà e cutulelle tonde

Eru adorna
D’un ardente culore
È d’un ghjuvellu
N’avia lu valore
Inde l’acqua cristallina
Spichjulava lu russore
Di centu quatretti rossi
Chì facia u me splindore

Stava biata
D’aligrezza in u pozzu
Altiera è viva
In ogni fiume Corsu
Quandu un ghjornu di viranu
Anu saltatu lu fossu
È una manu assassina
Hà suminatu u so toscu

U ghjargalellu
Fù u prima firitu
Quandu l’alloppiu
E fonte hà culpitu
Fendu chì a pisciarella
Di corre in cantu hà finitu
Ughjulendu un lamentu
Par ogni zattu sparitu

Par rimpiazzà
A pescia cusì fiera
Gattivu fù
Di sceglie a manera
Di mullà senza ghjudiziu
Issa truita straniera
Cù a pelle inargintata
Tutta pichjulata nera

Prestu s’hè vistu
L’affare andà di male
Cù ‘ssa disgrazia
In ogni fiuminale
À l’usu culunialistu
A pescia cuntinentale
Hà pigliatu nome è piazza
Di quella razza lucale

Spirendu facciu
Una prichera forte
Par a salvezza
Di quelle ch’ùn sò morte
Chì d’esse una pescia Corsa
Sarà sempre a me sorte
È di i fiumi paradisi
Apre vogliu signe porte

Chì d’esse una pescia Corsa
Sarà sempre a me sorte
È di i fiumi paradisi
Apre vogliu signe porte

À minnanna

Classé dans : Puesia corsa — 29 avril, 2010 @ 12:10

À minnanna dans Puesia corsa cimg3172

Ti vulia dì
Tuttu lu ringraziu
D’avè tantu datu
Di sta amore saziu
È in u me core zitellu
Scrittu u passatu u più bellu
Ma… 

Ma quandu chì i to purtelli
Par mè ùn s’apraranu più
Luccicaranu in i stelli
Sti sciali di a giuventù

Ti vulia fà
Un dolce basgiucciu
D’avemmi tinutu
Da quandu eru ciucciu
È sempre vede stu surrisu
Chì allumineghja u to visu
Ma…

Ma quandu chì i to purtelli
Par mè ùn s’apraranu più
Cuntaraghju à i stelli
Ste risate di giuventù

Ti vulia dà
Una stonda à sparte
Tantu temu oghje
Di vedeti parte
È solu davant’à sta porta
Sarrata pà l’ultima volta
Ma…

Ma quandu chì i to purtelli
Par mè ùn s’apraranu più
Circaraghju inde i stelli
Sti ricordi di giuventù

Maghju

Classé dans : Puesia corsa — 11 avril, 2010 @ 6:20

À l’albore di maghju
Affascia u sole
È calchì ragiu
Sempre incippà vole
In i ghjorni di maghju

Nant’à a sarra di maghju
Un filu di culore
Tesse in l’arbaghju
Un velu di fiore
Par i prati di maghju

Sott’à u celu di maghju
A notte spula
Un lume acciaghju
Stacciatu di luna
In i stelli di maghju

À spassu (zitelli)

Classé dans : Puesia corsa — 8 mars, 2010 @ 3:25

Vai prestu o lumacò
À truvà a ciriola
Datti vole un bombò
In a corte di a scola
È andà dopu à spassu
À sente a pichjarina
Chì stuzzicheghja u tassu
Per tastà a so farina
Macinata in u mulinu
Ind’è lu so camaratu
U catellu muntaninu
Ch’era dighjà viaghjatu
In u so amicu u ciocciu
Per assaghjà un fiadone
Scucinatu cù u brocciu
Fattu in u San Petrone
Duve ci era un parnicottu
Chì ballava a manfarina
Manghjendusi un biscottu
Cù a russiccia vulpina
Voca è gira è voca tondu
Cusì bellu u mio mondu
Voca è gira è voca tondu
Cusì bellu u mio mondu

123
 

Histoires, contes, nouvelles |
DEMBELE MOUSSA |
Charles-Henri MARICEL-BALTUS |
Unblog.fr | Créer un blog | Annuaire | Signaler un abus | amazonelibre
| Poèmes, citations, toutes m...
| Poèmes, muse